Ова е само почеток на една прекрасна недела исполнета со знаење, креативност и незаборавни авантури.
Вториот ден од Летната школа за деца „Библиоарт 2026“ помина во знакот на меѓугенерациското дружење, почитта и заедништвото.
Во рамки на денешните активности, децата го посетија Здружението на пензионери – Штип, каде преку дружење и заеднички активности имаа можност да се запознаат со животните искуства, традициите и вредностите на повозрасните. Средбата беше исполнета со искрени разговори, насмевки и размена на приказни, поттикнувајќи емпатија, комуникација и почитување меѓу генерациите.
Со оваа активност, НУ-УБ „Гоце Делчев“ – Штип ја продолжува својата културно-образовна мисија како простор што ги поврзува генерациите, го поттикнува пренесувањето на знаења и искуства и ги негува вредностите на читањето, дијалогот и заедништвото.
Упатуваме искрена благодарност до Здружението на пензионери – Штип за срдечниот пречек, гостопримството, посветеното внимание и прекрасната атмосфера што им ја приредија на нашите најмлади учесници. Посебна благодарност за вкусните домашни кифлички и крофни, кои ја направија оваа средба уште потопла и понезаборавна.
„Библиоарт 2026“ продолжува да создава нови пријателства, убави спомени и вредни животни лекции.






Третиот ден од Летната школа за деца „Библиоарт 2026“ помина во духот на културата, уметноста и креативното изразување.
Нашите мали учесници го посетија Завод Музеј на град Штип, каде се запознаа со дел од богатото културно-историско наследство на нашиот град, а потоа го посетија и
Н.У. Центар за култура "Ацо Шопов" Штип, доближувајќи се до светот на уметноста и сценската култура.
Денот го заокруживме со инспиративна детска театарска работилница, која со многу ентузијазам и посветеност ја водеше нашиот истакнат актер
Milorad Angelov. Преку игра, импровизација и глума, децата ги развиваа својата креативност, самодоверба и тимски дух.
Упатуваме искрена благодарност до Завод Музеј, Н.У. Центар за култура "Ацо Шопов" Штип и до Милорад Ангелов за топлиот пречек, гостопримството, издвоеното време и несебичната поддршка во реализацијата на активностите. Благодарение на нив, и овој ден од „Библиоарт 2026“ беше исполнет со нови знаења, инспирација и незаборавни доживувања за нашите најмлади учесници.






Четвртиот ден од „Библиоарт 2026“ ги одведе нашите мали учесници на вистинско патување низ историјата, природата и светот на филмот.
Денот започна со посета на ОМЦ „Киро Глигоров“ – Штип, каде децата погледнаа краток едукативен филм за животот и делото на првиот претседател на Република Македонија, Киро Глигоров, а потоа го разгледаа музејскиот простор со неговите лични предмети и експонати. Следуваше дружење со животните во ЗОО Штип, каде најмладите уживаа во природата и имаа можност одблиску да се запознаат со различни животински видови. Денот го заокруживме со прекрасна проекција на новиот анимиран филм „Моана“ во Киноверзум – Штип, која донесе многу насмевки, возбуда и убави впечатоци.
Искрена благодарност до ОМЦ „Киро Глигоров“ – Штип, ЗОО Штип и Киноверзум – Штип за срдечниот пречек, гостопримството и поддршката во реализацијата на денешните активности. Благодарение на соработката и отвореноста на овие институции, и овој ден од „Библиоарт 2026“ беше исполнет со нови знаења, радост и незаборавни спомени.