Од 1967 година, 2 април – односно, роденденот на Ханс Кристијан Андерсен, дански книжевник и еден од најголемите писатели на бајки, се смета за меѓународен ден на детската литература (International Children Book Day), кој се слави за да ја инспирира љубовта кон читањето и со посебно внимание кон детските книги.
Ова е седма година по ред, во чест на раѓањето на АНДЕРСЕН, во која НУ-У Библиотека „Гоце Делчев“ Штип организираше настан.
Овој пат настанот е насловен : „ДЕН СО АНДЕРСЕН“ прилагодувајќи се на ситуацијата со пандемијата и почитувајќи ги сите протоколи.
Заедно со ИНФОБУСОТ и библиотекари беа посетени ООУ „Славејко Арсов“ Штип и подрачното училиште во с. Караорман. Децата имаа можност да слушнат за Андерсен и неговите бајки, да слушаат најпознати аудио бајки од Андерсен како и читање бајки од библиотекари. Се зборуваше за книгата, нејзиното значење и читањето, се прочитаа познати мисли за книгата и на крајот им беа доделени освежување, сликовници, материјали за изработка на сопствени бајки на хамери, рекламни материјали од Библиотеката и Американското катче. Секое дружење со книгата е многу забавно, децата имаа можност да слушнат македонски песни, за се забавуваат, да вратат и изнајмат книги од ИНФОБУС-от за да на крај посакаа да останеме уште и да продолжиме со забавата.