Почетна

Претставници од НУ-УБ „Гоце Делчев“ на Саем на книга во Белград

Претставници на НУ-УБ „Гоце Делчев“ на 27 и 28 октомври присуствуваа на саемот на книга во белград. Средба со заменик-директорката и со лицата одговорни за меѓународна соработка и дигитализација при Народната библиотека на Србија, посета на Градската библиотека во Белград, средба со заменик-директорот на Универзитетската библиотека во Белград, интервју за Српската научна телевизија, се само дел од активностите што ги имаше делегацијата од Штипската библиотека во посета на Р. Србија.

Со предлози за понатамошна меѓународна соработка, беа продлабочени официјалните односи, при кое беше и конкретно договорено и учество на претставници од НУ-УБ „Гоце Делчев“ - Штип на Меѓународна конференција во 2017 година во Белград и вклучување на библиотекарски трудови во Меѓународното е-списание „Медиевал“ што за прв пат оваа година го издава Штипската библиотека.

Претставниците од Штип присуствуваа и на предавање за развој на дигитализацијата во библиотекарството, одржано во рамки на 61. Меѓународен саем на книга во Белград а директорката на библиотеката Милена Ристова-Михајловска имаше интервју во живо во емисија на Српска научна телевизија.

Успешно претставување на државниот натпревар „Млади библиотекари“ во Велес

По успешно спроведениот регионален натпревар во Штип, во Велес се одржа и Државниот натпревар ,,Млади библиотекари".Учество зеде младата библиотекарка, Ванеса Панова, ученичка во ООУ ,,Славејко Арсов" под менторство на проф. Милкица Миленковиќ.

Во силна конкуренција, нашата претставничка беше четврто рангирана со освоени 99 бода. Честитки за успехот со желби за напредок и многу нови знаења!Како претставници од НУ-УБ ,,Гоце Делчев", денес во Велес присуствуваа библиотекарките Ирена Јорданова и Жаклина Петрушева.

„ВЕСЕЛА СРЕДА“ - Од обичен настан до важно едукативно дружење со учениците

„Весела среда“ се повеќе се покажува како успешна содржина на НУУБ „Гоце Делчев“.На пример, денес наша цел повторно беше ширење на љубов кон книгата, преку заедничко дружење и ликовно изразување.

Нашите ученици од ПОУ "Ванчо Прке" од Ново Село изработија цртежи со книги и прочитаа по неколку редови од нашите убави книги. Секоја среда, со нова содржина се обидуваме да го прошириме убавиот збор за книгата и да ги научиме децата, уште од најмала возраст да разберат дека книгата може да биде добар и траен сопатник од кој може да се научи речиси се за животот.

НУУБ „Гоце Делчев“ Штип на 30 октомври 2016 домаќин на гости од Хрватска

Македонското културно друштво „Македонија“ од Сплит и Здружението КУРС од Сплит спроведуваат заедничка културно-уметничка соработка во периодот од 28 октомври до 1 ноември 2016. Тие ќе го претстават програмот „СМОШ-Фестивал на книжевност и музика“ во три града во Македонија, Охрид, Штип и Скопје.

Проектот има за цел културно поврзување на Македонија и Хрватска и продлабочување на нивните пријателски врски.

На 30 октомври 2016 предвидено е претставување во Штип во НУ-УБ „Гоце Делчев“ во Штип со почеток во 18:00 часот. На манифестацијата ќе се претстават „Клинци-Мандолинци“, Книжевност во живо со сплитските писателки Тонка Алуевиќ и Слободанка Џуџерија.

Клинци-Мандолинци ги сочинуваат Никола Митревски, Мате Кошутник (мандолина), Јероним Башиќ (мандола), Бригита Бановиќ (мандолончело) и Иван Новаковиќ (гитара) кои исполнуваат Македонски и Хрватски традиционални народни песни и кои дејствуваат веќе три години како дел од МКД „Македонија“ од Сплит под водство на професорот Ивана Кенк Калебиќ.